![bookmark](href="https://blogger.googleusercontent.com/img/b/R29vZ2xl/AVvXsEgW7lX_SI5MGeJiATZHT__93MEj2_4cBWKE0_9-4mZv9AUc1tlDMsXBonQBil-SgsgO7872PKPV3aukGJLVF3RjYwhGZA0WXDhx4r3ejDWatE8hUXYlxzSfl7pJnbTjbtE6Gelg8umxYwI/s1600/postrs.png)
നശിച്ചു പോകുന്ന ജൈവമാലിന്യങ്ങള് മുതല് കാലാതിവര്ത്തികളായ ഖര-മാലിന്യങ്ങള് വരെ നമ്മെ അലോസരപ്പെടുത്തുമ്പോഴാണ് മാലിന്യ സംസ്ക്കരണത്തിന്റെ ശാസ്ത്രീയതയെകുറിച്ച് നമ്മള് ബോധവാന്മാരാകുന്നത്. മാലിന്യ സംസ്ക്കരണത്തിന്റെ അശാസ്ത്രീയത കൊണ്ടാണ് ചിക്കുന് ഗുനിയ പോലുളള പകര്ച്ച വ്യാധികള് പടര്ന്നതും. കണ് തുറന്നു നോക്കിയാല് യഥാര്ത്ഥ ചിത്രം നമുക്കു വ്യക്തമാകും.
നഗര പ്രാന്തങ്ങളില് രാവിലെ പട്ടിയെയോ കുട്ടിയെയോ കൂട്ടി പ്രഭാത സവാരിക്കിറങ്ങുന്നവര് ഇപ്പോള് ഒരു സഞ്ചി കൂടി കരുതും 'മാലിന്യ നിക്ഷേപത്തിലേക്ക്' സംഭാവനയായിട്ട്. കൊച്ചി നഗരത്തിന്റെ പ്രാന്ത പ്രദേശമായ തൃക്കാക്കരയിലും മാലിന്യ നിക്ഷേപത്തിന്റെ കുന്നുകള് ഉയര്ന്നപ്പോഴാണ് മാലിന്യ സംസ്ക്കരണമെന്ന ബോധം തൃക്കാക്കര ഭരണസമിതിക്ക് ഉണ്ടായത്.
ഇപ്പോള് മാലിന്യത്തില് നിന്നും പ്ലാസ്റ്റിക് വേര്തിരിച്ച് ബാക്കി ജൈവ മാലിന്യം പഞ്ചായത്തില് വളത്തിനുപയോഗിക്കുന്നു. കുടുംബശ്രീ പ്രവര്ത്തകരാണ് പഞ്ചായത്തില് മാലിന്യ ശേഖരണം നടത്തുന്നത്. വീടുകള്, ആശുപത്രികള്, മാര്ക്കറ്റുകള് എന്നു വേണ്ട എല്ലായിടത്തുംനിന്നും ഇവര് മാലിന്യം ഓട്ടോറിക്ഷകളില് ശേഖരിക്കുന്നു. 34 കുടുംബശ്രീ വനിതകള് ഇതിനു വേണ്ടി നിയുക്തരായിരിക്കുന്നു. പഞ്ചായത്ത് സ്ഥാപിച്ചിരിക്കുന്ന രണ്ട് ബയോ പിന്നുകള് വഴിയാണ് മാലിന്യ സംസ്ക്കരണം നടത്തുന്നത്. ദിവസവും 300 കി.ഗ്രാം മാലിന്യം ജൈവവളമാക്കാന് സാധിക്കും.
സവിശേഷതകള്
1. തൃക്കാക്കര പഞ്ചായത്തിന്റെ സ്വന്തം ഭൂമിയിലാണ് മാലിന്യ സംസ്ക്കരണം.
2. ആയിരം ചെറു ബക്കറ്റുകള് വീടുകളില് മാലിന്യ നിക്ഷേപത്തിനു നല്കിയിരിക്കുന്നു. ഈ ബക്കറ്റുകള് വഴിയാണ് മാലിന്യ ശേഖരണം.
3. ഓരോ കുടുംബവും മാസത്തില് 50 രൂപ കുടുംബശ്രീ പ്രവര്ത്തകര് ഈടാക്കുന്നു.
4. മാലിന്യത്തില് ബാക്ടീരിയ കള്ച്ചര് ലായിനി തളിച്ച് സംസ്ക്കരിക്കുന്നതിനാല് പാരിസ്ഥിതിക മലീനീകരണം ഒട്ടുമില്ല.
5. ഉത്പാദിപ്പിക്കപ്പെടുന്ന ജൈവവളം കിലോയ്ക്ക് 8-15 രൂപയ്ക്കു കൃഷി ഭവന് വഴി വില്ക്കുന്നു.
6. ഒരു സ്ത്രീ തൊഴിലാളിക്ക് 3000 - 5000 രൂപ വരെ ലഭിക്കുന്നു.
