ഇന്ത്യന്‍ ടെലിവിഷന്‍ ചരിത്രത്തിലെ ആദ്യത്തെ സോഷ്യല്‍ റിയാലിറ്റി ഷോ- ഗ്രീന്‍ കേരള എക്സ്പ്രസിനെ അടുത്തറിയാനും, ദൈവത്തിന്റെ സ്വന്തം നാട്ടിലെ സുസ്ഥിര വികസനപ്രവര്‍ത്തനങ്ങള്‍ കാമറയില്‍ പകര്‍ത്താനും യൂറോപ്പിലെ പ്രമുഖ ടി.വി ചാനല്‍ കേരളത്തിലെത്തി. ഗ്രീന്‍ കേരള എക്സ്പ്രസ് സംഘത്തിനൊപ്പം ഒരാഴ്ച്ച ചെലവഴിക്കാനാണ് 'അര്‍ട്ടെ' (ARTE- Association Relative a la Television Europeenne)-യുടെ ഫ്രഞ്ച് കറസ്പോണ്ടന്റ് മര്‍ജൊലെയ്ന്‍ ഗ്രാപ്പെയും കാമറമാന്‍ ക്രിസ്റ്റഫെ ബാറെയറും കേരളത്തില്‍ വന്നത്. 

വിവിധ ദേശീയ മാധ്യമങ്ങളില്‍ നിന്നും ഗ്രീന്‍ കേരള എക്സ്പ്രസിനെക്കുറിച്ചുള്ള വാര്‍ത്തകളാണ് ആര്‍ട്ടെയെ അതിനെ അടുത്തറിയാന്‍ പേരിപ്പിച്ചതെന്ന് ഇവര്‍ പറയുന്നു. 'കേരളത്തിലെ ഗ്രാമങ്ങള്‍ അവരുടെ വികസനങ്ങള്‍ എടുത്തു പറഞ്ഞ് മത്സരിക്കുന്ന ഈ പരിപാടി തികച്ചും വ്യത്യസ്തമാണ്, അതിനാല്‍ തന്നെ ഇത് ഫ്രാന്‍സിലെ ഞങ്ങളുടെ പ്രേക്ഷകരെ അറിയിക്കണമെന്നുണ്ട്' ഗ്രാപ്പെ വ്യക്തമാക്കി. പ്രകൃതി സംരക്ഷണത്തിനായി നിരവധി പ്രവര്‍ത്തനങ്ങള്‍ നടക്കുന്ന ഫ്രാന്‍സിന് ഗ്രീന്‍ കേരള എക്സ്പ്രസ് ഒരു പുതിയ അനുഭവമായിരിക്കുമെന്നും ഗ്രാപ്പെ പറഞ്ഞു. 

ഗ്രീന്‍ കേരള എക്സ്പ്രസിനൊപ്പം ആലപ്പുഴയിലെ ചില ഗ്രാമങ്ങളില്‍ സഞ്ചരിച്ച ആര്‍ട്ടെ സംഘം, സൈക്കിളില്‍ സഞ്ചരിച്ചുള്ള അവതരണത്തെയും പ്രശംസിക്കുന്നു. പാലമേല്‍ പഞ്ചായത്തിലെ കുടുംബങ്ങള്‍ ഗ്രീന്‍ കേരള എക്സ്പ്രസ് ദൂരദര്‍ശനില്‍ കാണുന്നതും, ആവേശത്തോടെ തങ്ങളുടെ പഞ്ചായത്തിന് എസ്.എം.എസ് അയയ്ക്കുന്നതും ക്രിസ്റ്റഫെ ചിത്രീകരിച്ചു. വികസനത്തിലും പ്രകൃതി സംരക്ഷണത്തിലും ജനങ്ങളുടെ പങ്കാളിത്തം വ്യക്തമാക്കാന്‍ ആ രംഗം ഉപകരിക്കുമെന്നാണ് ക്രിസ്റ്റഫെയുടെ പക്ഷം. കേരളത്തിന്റെ പ്രകൃതിഭംഗി ആവോളം കാമറയില്‍ പകര്‍ത്താനും അദ്ദേഹം മറന്നില്ല.  

ജര്‍മ്മനിയിലും ഫ്രാന്‍സിലും ഒട്ടനവധി പ്രേക്ഷകരുള്ള ചാനല്‍ നെറ്റ്വര്‍ക്കായ ആര്‍ട്ടെയുടെ ആസ്ഥാനം സ്റ്റാര്‍സ്ബോര്‍ഗാണ്.  

സുസ്ഥിര വികസന മാതൃകകള്‍ തേടിയുള്ള ഗ്രീന്‍ കേരള എക്സ്പ്രസിന്റെ യാത്രകള്‍ കേരളത്തിന്റെ ഉള്ളറകളിലൂടെ കുതിക്കുമ്പോള്‍ മത്സരിക്കുന്ന പഞ്ചായത്തുകളും ആവേശത്തിലാണ്. തിരുവനന്തപുരത്ത് നടക്കുന്ന (എപ്രില്‍ 25 - മേയ് 2) ഫ്ളോര്‍ ഷൂട്ടിംഗില്‍ മുന്‍പ് രണ്ട് തവണത്തേക്കാളും പ്രകടമായ മാറ്റങ്ങളുണ്ടായിരുന്നു. ലോകത്തിന് മുന്‍പില്‍ തങ്ങള്‍ ശ്രദ്ധിക്കപ്പെടുന്നുമെന്നും കേരളത്തിലെ ജനങ്ങള്‍ തങ്ങളെ വിലയിരുത്തുമെന്നും ഉള്ള ചിന്തകള്‍ മത്സരിക്കുന്ന പഞ്ചായത്തുകളില്‍ ഉണര്‍വ് പകര്‍ന്നിട്ടുണ്ട്. 

വെറുതേ മത്സരിച്ചു പോകുന്ന വേദിയില്‍ നിന്നും അവരവരുടെ പഞ്ചായത്തുകളിലെ വികസനങ്ങള്‍ എണ്ണിപ്പറഞ്ഞ് മാര്‍ക് നേടാനും വ്യത്യസ്തമായ വികസനങ്ങളിലൂടെ മറ്റ് പഞ്ചായത്തുകളുടെയും കേരളത്തിന്റെ തന്നെയും മാതൃകയാവാനും ഓരോ ഗ്രാമങ്ങളും തയാറാകുന്നു. ഒന്നാം സമ്മാനത്തേക്കാളും ജനങ്ങളുടെ അംഗീകാരവും, പഞ്ചായത്തുകളില്‍ വികസനങ്ങള്‍ നടക്കുന്നില്ലെന്ന തരത്തിലുള്ള കുറ്റപ്പെടുത്തലുകള്‍ക്ക് മറുപടി നല്‍കാനും ഗ്രീന്‍ കേരള എക്സ്പ്രസിലൂടെ പഞ്ചായത്തുകള്‍ ശ്രമിക്കുന്നു.

വികസനപ്രവര്‍ത്തനങ്ങളെ ഏതു തരത്തില്‍ ജൂറിക്കു മുന്നില്‍ അവതരിപ്പിക്കണമെന്നുള്ള വ്യക്തമായ ധാരണയോടെയാണ് പഞ്ചായത്തുകള്‍ ഗ്രീന്‍ കേരള എക്സ്പ്രസിന്റെ വേദിയിലെത്തുന്നത്. തങ്ങളുടെ കുറവുകള്‍ മനസിലാക്കുവാനും, മറ്റു പഞ്ചായത്തുകളുടെ വികസനരീതികള്‍ സ്വീകരിക്കാനുള്ള ശ്രമങ്ങളും ഗ്രീന്‍ കേരള എക്സ്പ്രസിന്റെ വിജയം തന്നെയാണെന്ന് വ്യക്തം. 

മുന്‍ സി ഇ ഒ, ടെക്നോപാര്‍ക്ക് 

ഗ്രാമജീവിതത്തിന്റെ വേറിട്ട കാഴ്ച്ചകളും ഒപ്പം അവിടത്തെ സുസ്ഥിര വികസന മാതൃകകളും പ്രേക്ഷകര്‍ക്ക് മുന്നിലെത്തിക്കുകയും ചെയ്യുന്ന ഗ്രീന്‍ കേരള എക്സ്പ്രസ് സോഷ്യല്‍ റിയാലിറ്റി ഷോ വിജയകരമായി 25 എപ്പിസോഡ് പൂര്‍ത്തിയാക്കിയിരിക്കുന്നു. ശുചിത്വ മിഷനു വേണ്ടി സി-ഡിറ്റി നിര്‍മ്മിക്കുന്ന ഈ ഷോയ്ക്ക് വിവിധ മേഖലകളില്‍ നിന്നും ഒട്ടേറെ പ്രശംസകള്‍ ലഭിച്ചു വരുന്നു.

മികച്ച പഞ്ചായത്തിനെ വിലയിരുത്താന്‍ പ്രേക്ഷകര്‍ക്ക് അവസരം നല്‍കുന്ന തരത്തിലുള്ള എസ്.എം.എസ്  വോട്ടിംഗ് പരിപാടിയുടെ മാറ്റ് കൂട്ടുന്നു. ആദ്യത്തെ സോഷ്യല്‍ റിയാലിറ്റി ഷോ എന്ന നിലയില്‍ നേരിടുന്ന കുറവുകളെ പഞ്ചായത്തുകളുടെയും പ്രേക്ഷകരുടെ സഹകരണത്താല്‍ നികത്തുവാനും കഴിയുന്നുണ്ട്.

കേരളത്തിലെ പഞ്ചായത്തുകളെ വിമര്‍ശനങ്ങള്‍ കൊണ്ടു ഒതുക്കിയിരുന്നതില്‍ നിന്നും അവര്‍ക്ക് ഉണര്‍വ് നല്‍കുന്ന പ്രവര്‍ത്തനമാണ് ഗ്രീന്‍ കേരള എക്സ്പ്രസിലൂടെ നടത്തി വരുന്നത്. 25 എപ്പിസോഡില്‍ നിന്നും മുന്നോട്ടു നീങ്ങുമ്പോള്‍ പച്ചപ്പിന്റെ പ്രതീക്ഷകളും വര്‍ദ്ധിക്കുന്നു.

രാവിലെ 7 മണിക്ക് പുറപ്പെട്ടു, വട്ടിയൂര്‍ക്കാവ്  പഞ്ചായത്ത് ലക്ഷ്യമാക്കി.

ഗ്രീന്‍ കേരള എക്‌സ്പ്രസ് IV th Schedule  ല്‍ ഞങ്ങള്‍ പോയത് മലപ്പുറം ജില്ലയിലെ വേങ്ങര, പളളിക്കല്‍, തിരുവാലി   തൃശ്ശൂര്‍ ജില്ലയിലെ തിരുവില്വാമല എന്നീ പഞ്ചായത്തുകളിലേക്കായിരുന്നു. കാര്‍ഷിക ഗ്രാമം എന്നതിലുപരി 'ഗള്‍ഫ് മേഖല' യായി അറിയപ്പെടുന്ന വേങ്ങര ഗ്രാമ പഞ്ചായത്തിന്റെ വികസന സ്വപ്നം തന്നെ ഗള്‍ഫിലേക്ക് പോകുന്ന വരും തലമുറക്ക് ആവശ്യത്തിനു വിദ്യാഭ്യാസം  നല്‍കുക എന്നതായിരുന്നു.  അതിനായി വിദ്യാജ്യോതി എന്ന പദ്ധതി എല്ലാ ജില്ലകളിലും അവര്‍ ആരംഭിച്ചു.  ഊരകം മല മുതല്‍ കടലുണ്ടി പുഴ വരെ അതിരിട്ടു കിടക്കുന്നതാണ് വേങ്ങര പഞ്ചായത്ത്.

തുടര്‍ന്ന് 13/3/10 നു ഞങ്ങള്‍ പള്ളിക്കല്‍ ഗ്രാമ പഞ്ചായത്താണ് ഷൂട്ട് ചെയ്തത്. കൃഷിക്കു പ്രാധാന്യം നല്‍കികൊണ്ട് പഞ്ചായത്ത് നടത്തിവരുന്ന പ്രവര്‍ത്തനങ്ങളെല്ലാം തന്നെ വളരെ വിലപ്പെട്ടതാണ്.  കരിപ്പൂര്‍ എയര്‍പോര്‍ട്ട് ഉള്‍ക്കൊണ്ടിരിക്കുന്ന ഈ പഞ്ചായത്തില്‍ ഗള്‍ഫിലേക്ക് പച്ചക്കറികള്‍ കയറ്റി അയയ്ക്കുന്ന യൂണിറ്റുകള്‍ വളരെയേറെയുണ്ട്.  മലബാര്‍ മലയാളികള്‍ക്ക് മലബാറില്‍ നിന്നു തന്നെയുളള പച്ചക്കറികള്‍ നല്‍കുക എന്നതാണത്രേ അവരുടെ ലക്ഷ്യം

ഗ്രീന്‍ കേരള എക്സ്പ്രസിന്റെ നാലാമത്തെ ഷെഡ്യൂളില്‍ ഞങ്ങല്‍ കടന്നു പോയത്  തോളൂര്‍, വേളൂക്കര, അന്നമനട, എടപ്പാള്‍ എന്നീ പഞ്ചായത്തുകളിലൂടെയായിരുന്നു. മുന്‍പത്തേതു പോലെ തന്നെ രസകരമായ ഒട്ടേറെ അനുഭവങ്ങള്‍ പകര്‍ന്ന യാത്രയില്‍ ഗ്രാമവികസനങ്ങളില്‍ കൂടുതല്‍ ശ്രദ്ധപതിപ്പിച്ചായിരുന്നു ടീം നീങ്ങിയത്.

ജലസമൃദ്ധിയാല്‍ നിറഞ്ഞതാണ് തൃശ്ശൂര്‍ ജില്ലയിലെ തോളൂര്‍ പഞ്ചായത്ത്. 55% ശതമാനം കോള്‍ നിലങ്ങളുള്ള പഞ്ചായത്തില്‍ കൃഷിയാണ് പ്രധാന വികസന പദ്ധതി. സമുദ്ര നിരപ്പില്‍ നിന്നും താഴെയാണ് ഈ പഞ്ചായത്ത്. ലിഫ്റ്റ് ഇറിഗേഷന്‍ പദ്ധതി വഴി വെള്ളം മാറ്റിയാണ് ഇവിടെ നിലങ്ങളില്‍ കൃഷി ചെയ്യുന്നത്. ഫുട്ബോള്‍ താരം സി.വി പാപ്പച്ചന്റെ നാട് എന്ന നിലയിലും ഇവിടം ശ്രദ്ധ നേടിയിട്ടുണ്ട്.

തൃശ്ശൂരിലെ വേളുക്കര പഞ്ചായത്തില്‍ പ്ളാവിനെ ഒട്ടേറെ സ്നേഹിക്കുന്ന ഒരു മനുഷ്യനെ കാണാനായി. നാടിന്റെ വിവിധ പ്രദേശങ്ങളില്‍ പ്ളാവ് ജയന്‍ എന്ന ഇദ്ദേഹം പ്ളാവ് നട്ടു വളര്‍ത്തി വരുന്നു. പ്ളാവിന് മാത്രമേ ഭാവിയില്‍ പ്രകൃതിയേയും മനുഷ്യനേയും സംരക്ഷിക്കാന്‍ കഴിയുള്ളു എന്ന് ജയന്‍ പറയുന്നു. ചെറുപ്പകാലത്തില്‍ പട്ടിണി കിടക്കേണ്ടി വന്നപ്പോള്‍ ചക്കപ്പഴം കഴിച്ച് വിശപ്പടക്കുകയും പശുവിനും അടിനും പ്ളാവില നല്‍കി വളര്‍ത്തിയിരുന്നതും ജയന്‍ ഓര്‍ക്കുന്നു.

തൃശ്ശൂരിലെ അന്നമനട പഞ്ചായത്തിന്റെ പ്രധാന വികസന പദ്ധതി കൃഷിയാണ്. തോട് വൃത്തിയാക്കിയതിലൂടെയും വെള്ളക്കെട്ട് ഉണ്ടാക്കിയും കൃഷി ലാഭകരമായി നടത്തിവരുന്നതും ചിത്രീകരിച്ച് ഞങ്ങല്‍ യാത്ര തുടര്‍ന്നു.

മലപ്പുറം ജില്ലയിലെ എടപ്പാളിലെ മുഖ്യ വികസന പദ്ധതി ആരോഗ്യമാണ്. പഞ്ചായത്തിന്റെ കീഴില്‍ പ്രവര്‍ത്തിക്കുന്ന ക്ളിനിക്കില്‍ ചിലവൊന്നുമില്ലാതെ പ്രസവചികിത്സയും, സ്കൂള്‍ വിദ്യാര്‍ത്ഥികളില്‍ സൌജന്യ ആരോഗ്യ ക്യാംപ്, കുട്ടികള്‍ക്കും മുതിര്‍ന്നവര്‍ക്കുമുള്ള രക്തപരിശോധനാ ക്യാംപ് എന്നിവ നടത്തുന്നു. വീഡിയോ കൊണ്‍ഫറന്‍സിംഗ് സംവിധാനം ഉപയോഗിച്ച് രോഗികളുമായി ഡോകടര്‍മാര്‍ സംവദിക്കുന്നതും പരക്കെ നടപ്പിലാക്കി വരുന്നു.