കേരളത്തിന്റെ പച്ചപ്പൂം, ഗ്രാമജീവിതത്തിന്റെ നന്മകളും അടുത്തറിഞ്ഞ് ഗ്രീന്‍ കേരള എക്‌സ്പ്രസ് സംഘങ്ങള്‍ ഗ്രാമങ്ങളിലൂടെ യാത്ര നടത്തിയപ്പോള്‍, ഒട്ടേറെ അനുഭവങ്ങള്‍ അവരുടെ ഓര്‍മ്മകളില്‍ നിറഞ്ഞു.  അവയില്‍ ചിലത് ഇവിടെ പങ്കു വയ്ക്കുന്നു............അവരുടെ വാക്കുകളിലൂടെ.........

ദേശീയ പാതയോട് ചേര്‍ന്ന് കിടക്കുന്ന പഞ്ചായത്താണ് കല്ല്യാശ്ശേരി. കല്ല്യാശ്ശേരിയില്‍ ഞങ്ങള്‍ കണ്ട കെ.പി.ആര്‍ ഗോപാലന്റെ സ്മാരകവും, മൊറാഴ സ്മാരകവും ഹൃദ്യമായ അനുഭവമായിരുന്നു.  കല്ല്യാശ്ശേരിയിലെ അച്ചാര്‍ യൂണിറ്റും, മണ്ണിര കമ്പോസ്റ്റും, കൂട്ടുകൃഷിയും കല്ല്യാശ്ശേരിയിലെ വികസന പദ്ധതികളാണെന്ന് ഞങ്ങള്‍ കണ്ടറിഞ്ഞു.  ഇ.കെ നായനാറിന്റെ വീട്ടിലേക്ക് പോയതും നല്ലൊരു അനുഭവമായി.  സ്‌നേഹത്തോടെയുള്ള പെരുമാറ്റത്താല്‍ ഈ ഗ്രാമവാസികള്‍ ഞങ്ങളുടെ മനസ്സില്‍ ഇടം നേടിയെന്നു തന്നെ പറയാം.

ദാരിദ്ര്യ ലഘുകരണ പദ്ധതിയാണ് മാങ്ങാട്ടിടക്കാര്‍ മുന്നോട്ട് വയ്ക്കുന്ന പ്രധാന വികസന പദ്ധതി.  അതിന്റെ ഭാഗമായി ഞങ്ങള്‍ ആദ്യം പോയത് കരിമ്പാലം കോളനിയിലേക്കാണ്.  അതൊരു ആദിവാസി കോളനിയായിരുന്നു.  എന്നാല്‍ അവിടെ പട്ടിക വര്‍ഗ്ഗ കുടുംബങ്ങളാണ് താമസിക്കുന്നത് എന്ന് ഞങ്ങള്‍ക്ക് തോന്നിയതേ ഇല്ല.  വീടുകള്‍ എല്ലാം തന്നെ ഒരു നില മാളികകളാണ്.  അവരുടെ ഭാഷയിലോ, വസ്ത്രധാരണ രീതിയിലോ അവര്‍ ആദിവാസികളായി തോന്നിയിട്ടില്ല. മലനിര പ്രദേശമായ മാങ്ങാട്ടിടം പഞ്ചായത്തിന്റെ ഏറ്റവും വലിയ ഒരു നേട്ടമായിരുന്നു അത്.

തില്ലങ്കേരിയും ഒരു മലനാടന്‍ പ്രദേശമായിരുന്നു. അവിടെ ഞങ്ങള്‍ക്ക് വിസ്മയമായി തോന്നിയത് അവിടുത്തെ സ്‌കൂള്‍ കുട്ടികളാണ്. വളരെ ഉന്മേഷമാവാന്‍മാരാണ് അവിടുത്തെ കുട്ടികള്‍ എന്ന് ഞങ്ങള്‍ക്ക് മനസ്സിലായി.  കളിയരങ്ങുകളില്‍ അവര്‍ കാണിക്കുന്ന ഉത്സാഹം അതിഗംഭീരമാണ്.  വിദ്യാഭ്യാസത്തിന് മുന്‍തൂക്കം നല്‍കുന്ന പഞ്ചായത്തായതിനാല്‍ ഇവിടത്തെ വിദ്യാഭ്യാസരംഗം ഒട്ടേറെ വിജയക്കുതിപ്പുകള്‍ നേടിയിട്ടുമുണ്ട്.

ചെറുവത്തൂര്‍ ഒരു തീരപ്രദേശ ഗ്രാമമാണ്. ഏറ്റവവും കൂടുതല്‍ ബുദ്ധിമുട്ടുകള്‍ അനുഭവിച്ചതും അവിടെ തന്നെയാണ്. അവിടെയുള്ള ചിത്രീകരണത്തില്‍ ഞങ്ങള്‍ പ്രാധാന്യം നല്‍കിയത് മത്സ്യ കൃഷിക്കായിരുന്നു. കല്ലുമ്മക്കായ് കൃഷി ഏറെ മനോഹരമായ ഒന്നാണ്.  കായലിന്റെ തീരത്ത്  അടുക്കടുക്കായി മുള ഉപയോഗിച്ച് ചിപ്പികള്‍ വെള്ളത്തില്‍ താഴ്ത്തിയിട്ടിരിക്കുന്നു.  ഹാര്‍ബര്‍ ചിത്രീകരിക്കാന്‍ പോയപ്പോള്‍ മഹാകവി  കുട്ടമത്തിന്റെ തറവാടും ഞങ്ങളെ  അതിശയിപ്പിച്ച ഒന്നായിരുന്നു. മത്സ്യതൊഴിലാളികളില്‍ ചിലര്‍ തങ്ങളെക്കൂടി കാമറയിലെടുക്കണമെന്ന് നിര്‍ബന്ധം പിടിച്ചതും വേറിട്ട അനുഭവമായി.

മലനാടന്‍ ഗ്രാമപ്രദേശമായ മടിക്കൈയാണ് വടക്കുനാഥന്‍ സിനിമയുടെ ലൊക്കേഷനായത്. ആദ്യമായി ഞങ്ങള്‍ പന തോട്ടത്തിലേക്കാണ് പോയത്, അപ്പോള്‍ അതിഗംഭീരങ്ങളായ ഒത്തിരി കാഴ്ചകള്‍ കണ്ടു.  പച്ചപ്പിന്റെ മനോഹാരിതയുടെ മാറ്റു കൂട്ടി ഒഴുകുന്ന ഒരു പുഴയും തറയില്‍ അവിടവിടെയായി വീണു കിടക്കുന്ന മഞ്ഞ നിറമുള്ള പനം കായും.  കൈത ചക്കകള്‍ നിറഞ്ഞു നില്‍ക്കുന്ന വീഥിയിലൂടെയും ഞങ്ങള്‍ യാത്ര ചെയ്തു.  അവിടെ ഞങ്ങള്‍ ഒരു അപ്പുപ്പനെ പരിചയപ്പെട്ടു.  ഇത്രയും വയസ്സായി അവശനായിട്ടും കൃഷിയില്‍ അദ്ദേഹം ഊര്‍ജ്ജസ്വലനായി ഏര്‍പ്പെട്ടിരിക്കുന്നു.  തോട്‌പോലെ കിടക്കുന്ന ഒരു ചെറിയ കുളവും, 'പഴശ്ശിരാജ', 'വടക്കുംനാഥന്‍'  എന്നീ സിനിമകളില്‍ ചിത്രീകരിച്ച കല്യാണ്‍ ഭവന്‍   ഞങ്ങള്‍ കണ്ട മനോഹരങ്ങളായ കാഴ്ചകളായിരുന്നു.

ഒരു സമ്പൂര്‍ണ്ണ കൃഷി പ്രദേശമാണ് ചെറുതാഴം പഞ്ചായത്ത്.  കണ്ണിന് കുളിരേകുന്ന ദേശാടന പക്ഷികളും കണ്ടല്‍ കാടുകളും അവരുടെ വലിയ സമ്പത്തുകളാണ്.  മറ്റുള്ള പഞ്ചായത്തുകളില്‍ നിന്നും വേറിട്ടു നില്‍ക്കുന്ന വികസന പദ്ധതിയാണ് പഞ്ചായത്തുകാര്‍ മുന്നോട്ടു വച്ചത്.  നെല്ല് സംസ്‌ക്കരണ കേന്ദ്രം.  ചെറുതാഴത്തെ രാമപുരത്ത് കണ്ട അമ്പലത്തിലെ കുളം ചരിത്ര പ്രാധാന്യം ഉള്ള ഒന്നായിരുന്നു. ചെറിയ  ചെറിയ കുന്നുകളും താഴ്‌വരകളും അടങ്ങിയ ഒരു ചെറിയ പ്രദേശമാണ് ചെറുതാഴം.  ചെറുതാഴത്തില്‍  വിസ്തീര്‍ണ്ണമുള്ള കൃഷിയിടങ്ങളില്‍ പൂത്ത് നില്‍ക്കുന്ന നെല്‍കതിരുകളും പ്രധാനപ്പെട്ട കാഴ്ചയാണ്.